Урматтуу мекендештер!
Ош технологиялык университетинин ардактуу жалпы эмгек жамааты, кадырлуу агай-эжейлер жана сыймыктуу студенттер!
Сиздерди кирип келе жаткан 2026-Жаңы жылыңыздар менен чын дилимден куттуктаймын!
Жаңы жыл — жаңы үмүттөрдүн, жаңы максаттардын, чоң ийгиликтердин жана жетишкендиктердин башаты. Биз 2025-жылды зор сыймык менен узатып жатабыз. Бул жыл Ош технологиялык университети үчүн тарыхый өзгөрүүлөргө, эл аралык ийгиликтерге жана олуттуу жетишкендиктерге бай болду.
2025-жылы Ош технологиялык университети алыскы жана жакынкы чет өлкөлөрдүн алдыңкы жогорку окуу жайлары менен кызматташтыкты кеңейтип, бир катар эл аралык келишимдерге кол койду. Академиялык мобилдүүлүк программаларынын алкагында ОшТУнун студенттери Көз карандысыз Мамлекеттердин Шериктештиги, Шанхай кызматташтык уюму, Түрк Мамлекеттер Уюму, Евробиримдикке кирген өлкөлөрдө жана Түштүк Кореяда билим алышты.
2025-жылы 350 чет өлкөлүк (Өзбекстан, Түштүк Корея жана Кытай) окумуштуу окутуучулар Ош технологиялык университетинин базасында квалификациясын жогорулатты. Ал эми, 2025-жылы Ош технологиялык университетинин 30га жакын профессордук-окутуучулук курамы Кытай, Россия, Австрия, Өзбекстан жана Казакстандагы жогорку окуу жайлардан жана илимий мекемелерден эл аралык тажрыйбаны өздөштүрүп, квалификациясын жогорулатты
Евробиримдиктин Erasmus+ программасынын «Жогорку билим берүүдө потенциалды жогорулатуу» чакырыгынын жыйынтыгында Ош технологиялык университети 69 млн 558 миң сомдук эл аралык долбоордун жеңүүчүсү аталып, долбоордун координатору болуп профессор У.Т.Аттокуров бекитилди.
Университеттин окуу корпустары, лабораториялары жана спорттук аянтчалары заманбап талаптарга ылайык жаңыланды. Кыргызстанда алгачкылардан болуп ОшТУнун 2-корпусунун фасады күн панелдери менен жабдылып, күнүнө 200 кВтка чейин электр энергиясын өндүрө баштады.
Бүгүнкү күндө ОшТУ инженер-технологдорду, программист-экономисттерди, геологдорду, курулушчу жана энергетик адистерди даярдоодо мүмкүнчүлүктөрүн кеңейтип, студенттерге эл аралык билим алуу жана стажировкадан өтүү шарттарын түзүүдө.
Университетибиз эл аралык аккредитациядан 5 жылдык мөөнөткө ийгиликтүү өттү. Ошондой эле 2025-жылы ОшТУ дүйнөлүк рейтингдерде жогорку көрсөткүчтөрдү багындырып, эл аралык аброюн бекемдеди:
- QS Stars™ рейтингинде – 4 жылдыздуу университет макамына ээ болду;
- Round University Ranking (RUR) рейтингинде дүйнөдө 734-орунду, ал эми Кыргызстанда 1-орунду ээлеп, тарыхый ийгилик жаратты;
- «Маалыматтык технологиялар жана системалар» багыты EdNet рейтингинде ТОП-5 программалардын катарына кирди;
- Абитуриенттердин тандоосу боюнча Ош технологиялык университети өлкөдөгү алдыңкы 5 университеттин катарына кирди.
- Erasmus+ программасынын CBHE 2025 чакырыгынын жыйынтыгында Кыргызстандан Ош технологиялык университети эл аралык Digitech долбоорунун жеңүүчүсү болуп тандалды.
- Мамлекеттик тилди өнүктүрүүгө кошкон салымы жана жогорку деңгээлдеги иш-чараларды уюштургандыгы үчүн Ош шаардык мэриясы тарабынан “МЫКТЫ ЖОГОРКУ ОКУУ ЖАЙ” сыйлыгы менен сыйланды.
Илим жана инновация багытында 2025-жыл университет үчүн олуттуу жетишкендиктер менен коштолду. 4 жаңы заманбап лаборатория ишке берилип, бир катар ири илимий жана инновациялык долбоорлор утуп алынды.
Эки тараптуу кызматташуу келишиминин алкагында Бинтуань Синьсинь кесиптик-техникалык окуу жайынын колдоосу менен ошТУнун базасында 2,5 млн сомдук нарктагы 2 заманбап лаборатория ачылды. Бул энергетика багытындагы адистерди даярдоо үчүн чоң мүмкүнчүлүк жаратты.
Материалдык-техникалык базаны чыңдоого максатында Pamir Testing Co., Ltd. ишканасы менен ОшТУнун ортосундагы окуу-өндүрүштүк лабораторияны түзүү туурасында эки тараптуу кызматташуу келишиминин алкагында 300 000 АКШ долларынан ашык нарктагы жабдуулар ОшТУнун базасына алып келинди. Бул жабдуулар геология багытындагы адистерди даярдоодо лабораториялык илимий-изилдөө иштерин жүргүзүүдө билимди, илимди жана өндүрүштү интеграциялоого багытталган жана Кыргызстандагы алгачкы заманбап жабдуулар менен камсыздалган, акыркы үлгүдөгү анализдерди чыгарган лаборатория болот.
Университеттин «Известия ОшТУ» илимий журналы эл аралык деңгээлге чыгып, анын жаңыланган электрондук версиясы («Илим ОшТУ») 2025-жылы 2 саны менен жарык көрдү. Журналда 80 илимий макала жарыяланып, алар РИНЦ, ошондой эле Scopus жана Web of Science маалымат базаларына киргизилди.
Мындан тышкары, университеттин илимпоз-окутуучулары тарабынан 6 монография даярдалып, басмадан жарык көрдү. Эл аралык Scopus маалымат базасында 45 илимий макала жарыяланды, 100гө жакын илимий макала жарык көрүү алдында турат. Ошондой эле 2 окутуучу илимдин кандидаты, 8 окутуучу доцент окумуштуулук наамына ээ болушту.
ОшТУ Инновациялык фонд агенттигинин гранттык конкурсунда республика боюнча 4-орунду ээлеп, II этапка 4 илимий-инновациялык долбоорду ийгиликтүү өткөрдү.
Ошондой эле университет Кытай мамлекетинин стратегиялык темир жол долбоору үчүн адистерди даярдоочу негизги өнөктөш катары тандалды жана Кытай Эл Республикасындагы жогорку окуу жайлар жана илимий мекемелер менен 10го жакын эл аралык илимий долбоорлор башталды.
Бул жетишкендиктер — жалпы эмгек жамаатыбыздын, агай-эжейлерибиздин, кызматкерлерибиздин жана студенттерибиздин тынымсыз эмгегинин жемиши. Баарыңыздарга чын жүрөктөн ыраазычылык билдиремин.
Кадырлуу кесиптештер, урматтуу студенттер!
Келе жаткан Жаңы жыл сиздерге жаңы мүмкүнчүлүктөрдү, чыгармачылык демди, бекем ден соолукту жана бакубат жашоону алып келсин! Кыргызстаныбызда тынчтык, ынтымак жана биримдик өкүм сүрүп, илим-билимдүү, мекенчил жаштарыбыз көбөйө берсин!
Жаңы жылыңыздар кут болсун!
Терең урматтоо менен,
Ош технологиялык университетинин ректору
Турсунбаев Жанболот Жанышович
