2025-жылдын 22-декабрында Ош технологиялык университетинде 22-декабрь — Энергетиктер күнүнө карата уюштурулган «Энергетикадагы инновациялар: өнүгүү перспективалары жана практикалык чечимдер» аттуу эл аралык илимий-практикалык конференция ийгиликтүү өткөрүлдү.
Конференцияга университеттин жетекчилиги, профессордук-окутуучулук курамы, илимпоздор, жаш изилдөөчүлөр, магистранттар жана студенттер, ошондой эле сырттан чакырылган коноктор катышты.
Иш-чаранын негизги максаты — энергетика тармагындагы актуалдуу көйгөйлөрдү талкуулоо, аларды чечүүнүн заманбап жолдорун сунуштоо, жаш окумуштуулардын илимге болгон кызыгуусун арттыруу, илимий иштердин жыйынтыктарын коомчулукка таанытуу жана эл аралык илимий байланыштарды өнүктүрүү болуп саналат.
Конференция Кыргыз Республикасынын Мамлекеттик гимни менен ачылып, куттуктоо сөздөрү менен уланды. Иш-чарада окуу иштери боюнча проректор Улукбек Мамытов, илим жана инновациялар боюнча проректор Нурланбек Танаков, Энергетика жана транспорт институтунун директору Нуркул Мурзакулов, ошондой эле чакырылган коноктор сөз сүйлөп, куттуктоолорун билдиришти.
Ошондой эле окууда мыкты жетишкен студенттерге Ош технологиялык университетинин Ардак грамоталары тапшырылды.
Андан соң конференциянын уюштуруу маселелери ОшТУнун Илим, инновациялар жана кошумча билим берүү бөлүмүнүн башчысы, биология илимдеринин кандидаты Исраилова Г.С. тарабынан тааныштырылды.
Пленардык жыйында бир катар илимий баяндамалар угулду. Атап айтканда:
Казакстан Республикасынын Евразия улуттук университетинин профессору, техника илимдеринин доктору, Эл аралык Муз академиясынын академиги Алимгазин Алтай Шурумбаевич «ЖЭБдердин ысык калдыктарын коммуналдык инфраструктурага интеграциялоо» темасында баяндама жасады;
Ош технологиялык университетинин профессору, «Электр жабдуулары жана жылуулук энергетикасы» кафедрасынын башчысы, техника илимдеринин кандидаты Алдашева Нуржамал Тунаевна «Энергияга болгон муктаждык жана айлана-чөйрөнү коргоо» аттуу баяндамасын сунуштады.
Конференциянын экинчи бөлүгүндө секциялык жыйындар өткөрүлүп, анда катышуучулар энергетика тармагындагы заманбап изилдөөлөр, практикалык чечимдер жана инновациялык долбоорлор боюнча пикир алышты.
Жыйынтыгында секциялык баяндамалар боюнча отчеттор берилип, активдүү катышуучуларга дипломдор тапшырылды.
