Ош технологиялык университетинде «Жылдын мыкты жаш ТӨМ элчиси» аттуу университеттик конкурс ийгиликтүү өткөрүлдү. Иш-чара Ош технологиялык университетинин 2024–2034-жылдарга карата Экологиялык туруктуу өнүгүү жана климаттык адаптация боюнча стратегиялык концепциясынын алкагында уюштурулду.
Конкурстун негизги максаты — студенттердин Туруктуу өнүгүүнүн максаттары (ТӨМ) боюнча билимин тереңдетүү, климаттык тобокелдиктерге адаптация маселелери боюнча аналитикалык ой жүгүртүүсүн өнүктүрүү, ошондой эле экологиялык жоопкерчиликтүү жаш лидерлерди даярдоо болуп саналат.
Конкурска Ош ТУнун 4 институту жана 1 инновациялык борбору активдүү катышты. Тактап айтканда, төмөнкү түзүмдөр өз командаларын сунушташты:
Архитектура жана курулуш институту
Инновациялык маалымат технологиялар институту
Экономика жана башкаруу институту (ЭЖБИ)
Эл аралык мамилелер, укук жана билим берүү институту
Инновациялык илимий-технологиялык борбор
Катышуучулар бир нече этаптан турган таймашта ТӨМ боюнча терең теориялык билимин, практикалык ой жүгүртүүсүн, кейс-тапшырмаларды чечүү жөндөмүн жана командалык иш алып баруу маданиятын көрсөтүштү. Айрыкча климаттын өзгөрүшү, экологиялык туруктуулук, жашыл экономика жана климатка адаптация маселелери кеңири талкууланды.
Калыстар тобунун чечими менен конкурстун жеңүүчүсү болуп Инновациялык маалымат технологиялар институтунун командасы табылды. Жеңүүчү команда ТӨМ темасын санариптик технологиялар жана инновациялык чечимдер менен айкалыштырып, стратегиялык концепциянын практикалык ишке ашуусуна шайкеш келген жогорку деңгээлдеги даярдыгын көрсөтө алды.
Аталган конкурс Ош технологиялык университетинде экологиялык туруктуу өнүгүү жана климаттык адаптация багытындагы стратегиялык максаттарды ишке ашыруунун маанилүү инструменттеринин бири болуп саналат жана мындан ары да жыл сайын өткөрүлүп турат.
