Ош технологиялык университетинде Ош шаарынын Мэриясынын Илимий-техникалык кеңешинин жыйыны болуп өттү. Иш-чарада Кыргыз Республикасынын Илим, жогорку билим берүү жана инновациялар министрлиги тарабынан каржыланган илимий-изилдөө иштеринин жыйынтык отчеттору кабыл алынып, кеңири талкууланды.
Жыйындын алкагында төмөнкү изилдөөлөрдүн жыйынтыктары сунушталды:
- т.и.к., доцент Бакирова Назгүл Абдыкеримовна
«Бронежилеттердин конструкциялык-технологиялык параметрлерин негиздөө»
Изилдөө — коопсуздукту чыңдоонун жана заманбап коргоочу каражаттарды иштеп чыгууда жергиликтүү илимий потенциалды пайдалануунун негизги багыты. Шаарыбыздын коопсуздук системаларын чыңдоодо абдан маанилүү салым кошот. - т.и.к., доцент Жусуев Үметали Султанович
«Деформирленген негиздердеги фундаменттердин ар түрдүү схемаларынын ийилүү моделдери»
Теманын мааниси — курулуш иштеринин сапатын жана коопсуздугун жогорулатууда. Реалдуу шарттарды эске алуу менен жүргүзүлгөн моделдөө инженердик каталардын алдын алып, жер титирөөлөр сыяктуу сырткы факторлорго туруктуу курулуштарды камсыздайт. - б.и.к., доцент Тешебаева Зулумкан Абдыманаповна
«Шаардын жашыл зоналарынын биологиялык коргоо ыкмаларын иштеп чыгуу»
Изилдөө жашыл мурастарыбызды сактоонун, зыянкечтерге каршы биологиялык күрөш ыкмаларын өркүндөтүүнүн жана экологиялык туруктуулукту камсыздоонун негизги багыты болуп саналат. Шаардын экологиясы түздөн-түз тургундардын ден соолугу жана жашоо сапатына байланыштуу. - т.и.к., ОшТУнун профессору Калдыбаев Нурланбек Арзымаматович
«Брусчатка таштарды өндүрүүнүн минералдык-сырьёлорун жана технологиялык параметрлерин негиздөө»
Изилдөө шаар инфраструктурасын чыңдоого, тротуарларды сапаттуу материалдар менен камсыздоого жана жергиликтүү өндүрүштү өнүктүрүүгө түздөн-түз салым кошот. Экономикалык жактан жана практикалык жактан маанилүү.
Илимий-техникалык кеңештин мүчөлөрү изилдөөлөрдүн шаардык инфраструктураны жакшыртууда, экологиялык абалды көзөмөлдөп турууда, инженердик коопсуздукту камсыздоодо жана жалпы шаар өнүгүүсүндө практикалык мааниси жогору экенин белгилешти.
Ош технологиялык университети илимий потенциалды өнүктүрүү жана шаардык маселелерди илим аркылуу чечүүгө салым кошууну мындан ары да уланта берет.
