Ош технологиялык университетинде Шанхай кызматташтык уюмунун алкагында “Өзбекстандын жана Кыргызстандын жаштары — кошуна элдин достугунун улантуучулары” аттуу эл аралык маданий-билим берүү иш-чарасы болуп өттү. Иш-чаранын максаты — эки өлкөнүн маданият, билим жана илим чөйрөсүндө кызматташтыкты кеңейтүү, эл достугун даңазалоо жана өз ара түшүнүшүүнү бекемдөө.
Иш-чарага катышуу үчүн ШКУнун Өзбекстандагы элдик дипломатия борборунун директору К.К.Собиров жетектеген 33 адамдан турган делегация келди. Делегациянын курамында Өзбекстандын эл аралык ислам академиясы, Ташкент башкаруу жана экономика институту, Өзбекстандын мамлекеттик искусство жана маданият институту, Юнус Ражабий атын. улуттук музыка жана аткаруу искусствосу институту, Анжиян мамлекеттик университети жана Фергана мамлекеттик техникалык университетинин өкүлдөрү, ШКУнун Кыргызстандагы маданий-интеграциялык борборунун директорунун орун басары С.Б.Бекболотов жана басма сөз катчысы М.Т. Огонбаева, “Чыңгыз Айтматов атындагы Эл аралык Ысык-Көл форуму” КБнын вице-президенти Д.Жумабаева жана ОшТУнун активи катышты.
Келген конокторду окуу жайдын жетекчилиги тосуп алды. Иш-чаранын расмий бөлүгүндө Ош ТУнун сырткы байланыштар жана өнүгүү боюнча проректору, профессор А.Т.Акматалиев сөз сүйлөп, меймандарга университеттин атынан ыраазычылык билдирди. Иш-чаранын жүрүшүндө коноктор Ош ТУнун негизги окуу корпусундагы кафедралардын жана бөлүмдөрдүн ишмердүүлүгү менен таанышып, профессордук-окутуучулук курам жана студенттер менен жолугушту.
Андан кийин иш-чаранын алкагында экологиялык кызматташуу туурасында тегерек стол өткөрүлүп, жаштардын аймактык өнүгүүдөгү орду, экологиялык демилгелер жана келечектеги кызматташтык маселелери талкууланды. Анда Технология жана жаратылышты пайдалануу институтунун директору, доцент Зулумкан Тешебаева «Жаштардын Борбор Азиядагы экологиялык маселелерди чечүүдөгү ролу жана экологиялык демилгелер» темасында мазмундуу илимий баяндама жасады.
“Бир тууган үчүн китеп” аттуу акция болуп, Кыргызстандын белгилүү акындары Тагаев Тургунбай жана Матлюбоханим Мусабоева келген конокторго ыраазычылык сөздөрүн айтып, өздөрүнүн чыгармаларын жана китептерин белекке беришти.Маданий бөлүктө “Өз ара боордоштук – элдердин биримдиги” аттуу чыгармачылык көргөзмөлөр жана эки мамлекеттин маданиятын чагылдырган композициялар коюлуп, улуттук обон-сазы камтылган концерттик программа тартууланды.
Жолугушуунун соңунда ШКУнун Өзбекстандагы элдик дипломатия борбору менен ОшТУнун ортосунда маданият, билим берүү жана илим тармагындагы кызматташтыкты өнүктүрүүгө багытталган кызматташуу меморандумга кол коюлду.
