2025-жылдын 12-ноябрында Ош технологиялык университетинде табигый-гуманитардык илимдер борборунун директору, педагогика илимдеринин доктору, профессор А.Т. Саттарованын уюштуруусу менен Кыргыз Республикасынын билим берүүсүнө эмгек сиңирген кызматкер, “Даңк” орденинин ээси, “Кыргызтест” системасынын түптөөчүсү — Батма Болоталиевна Топоева-Ставинская тарабынан “Кыргыз тилин санариптик окутуу” платформасынын таанытымы болуп өттү.
Иш-чаранын негизги максаты — кыргыз тилин окутууда заманбап санариптик ыкмаларды жайылтуу, окутуучулар менен студенттерди жаңы онлайн билим берүү мүмкүнчүлүктөрү менен тааныштыруу жана билим берүү тармагында кыргыз тилинин санариптик мейкиндигиндеги ордун чыңдоо болду.
Таанытымга университеттин кыргыз тили жана гуманитардык багыттагы окутуучулары, техникалык институттардын студенттери, ошондой эле санариптик билим берүү тармагында иш алып барган адистер катышышты. Катышуучулар платформа аркылуу сабактарды интерактивдүү технологиялар менен өткөрүү, онлайн тесттерди түзүү, тапшырмаларды автоматтык баалоо жана студенттердин жетишкендиктерин көзөмөлдөө мүмкүнчүлүктөрү менен таанышышты.
Иш-чараны Ош технологиялык университетинин окуу иштери боюнча проректору, тарых илимдеринин кандидаты, профессор У. Ж. Мамытов ачып берип, мамлекеттик тилдин учурдагы көйгөйлөрү, окуу жайда анын аброюн жана беделин чыңдоо максатында жүргүзүлүп жаткан иштер тууралуу белгилеп өттү.
Өз сөзүндө профессор А.Т. Саттарова мындай платформалар кыргыз тилин окутууну заманбап деңгээлге чыгарып, билим берүү процессине инновациялык ыкмаларды киргизүүгө өбөлгө түзөрүн баса белгиледи.
Ал эми Батма Болоталиевна Топоева-Ставинская катышуучуларга платформанын түзүлүү тарыхы, иштөө өзгөчөлүктөрү жана кыргыз тилин үйрөтүүдөгү практикалык мүмкүнчүлүктөрү тууралуу кеңири маалымат берип, жандуу мисалдар менен интерактивдүү бөлүгүн көрсөттү.
Иш-чаранын жүрүшүндө студенттер жана окутуучулар активдүү катышып, суроолорун берип, кыргыз тилин санариптик чөйрөдө өнүктүрүүнүн келечеги боюнча талкуу жүргүзүштү.
Таанытымдын жыйынтыгында катышуучулар бул платформа билим берүүнүн сапатын жогорулатууга, студенттердин кызыгуусун арттырууга жана кыргыз тилин окутууну жаңы деңгээлге чыгарууга чоң мүмкүнчүлүк түзөрүн белгилешти.
