Ош технологиялык университети эл аралык академиялык кызматташтыкты кеңейтүү багытында жаңы кадам таштады. Өзбекстан Республикасындагы Фергана мамлекеттик техникалык университетинин окумуштуулары 1 айлык стажировкага келишти. Бул стажировка окуу жайдын ”Байланыш тармактары жана телекоммуникациялык системалар” кафедрасында ишке ашырыла баштады.
Келген конокторду ОшТУнун сырткы байланыштар жана өнүктүрүү боюнча проректору Асанбек Акматалиев тосуп алып, жолугушуу өткөрдү. Жолугушууда билим берүү сапатын жогорулатуу, биргелешкен илимий долбоорлорду ишке ашыруу жана окутуучулар менен студенттер үчүн алмашуу программаларын иштеп чыгуу маселелери талкууланды.
Ферганадан келген окумуштуулар стажировканын алкагында ОшТУнун студенттерине конок лекцияларды окуп, мастер-класстарды өткөрүп, илимий-изилдөө иштеринин жаңы ыкмаларын тааныштырып жатышат.
