Ош технологиялык университетинде Табигый–гуманитардык илимдер борборунун коомдук илимдер кафедрасы тарабынан улуу тарыхый инсандардын мурасын даңазалоо жана студенттердин тарыхый аң-сезимин өркүндөтүү максатында “Алымбек Датка – тарыхый инсан” аттуу тегерек стол өткөрүлдү.
Иш-чараны Ош технологиялык университетинин илим жана инновациялар боюнча проректору, а.ч.и.д., доцент Танаков Нурлан Токтогулович ачып берип, өз сөзүндө Алымбек Датканын кыргыз элинин тарыхындагы ордуна токтолуп, анын саясий жана коомдук ишмердиги бүгүнкү күндө да жаштар үчүн чоң сабак экендигин баса белгиледи. Ошондой эле ал мындай илимий жыйындардын маанилүүлүгүн белгилеп, жаштарга тарыхый инсандардын мурасын терең үйрөнүүгө чакырды.
Тегерек столдо бир катар илимий баяндамалар окулду:
- Ош мамлекеттик педагогикалык университетинин доценти, тарых илимдеринин кандидаты Зулпуева Р.Ж. – «Алымбек Датканын Кокон хандыгындагы орду жана саясий аракеттери»;
- Ош мамлекеттик университетинин доценти, тарых илимдеринин кандидаты Арстанов С.А. – «Алымбек Датка – коомдук ишмер»;
- Ош технологиялык университетинин доценти, тарых илимдеринин кандидаты Абдыразакова З.М. – «Алымбек Датканын саясий ишмердүүлүгү»;
Баяндамалардын жүрүшүндө студенттер жана окутуучулар тарабынан ар түрдүү суроолор берилип, илимий талкуу жүрдү.
Иш-чаранын соңунда коомдук илимдер кафедрасынын башчысы, т.и.к., доцент Гулжамал Бекмурзаева жыйынтык сөз сүйлөп, бардык катышуучуларга ыраазычылык билдирди. Ал өз сөзүндө бул тегерек столдун студенттер үчүн тарыхый билимди тереңдетүүдөгү жана мекенчилдик сезимди бекемдөөдөгү орду зор экенин белгиледи.
