2025-жылдын 22-августунда Ош технологиялык университетине Австриянын Зальцбург университетинин расмий делегациясы келди. Делегацияны ОшТУнун ректору, профессор Ж. Ж. Турсунбаев тосуп алып, университеттин ишмердүүлүгү жана эл аралык кызматташтык багытындагы жетишкендиктер боюнча маалымат берди.
Жолугушууга Зальцбург университетинин профессорлору – Жозеф Штробль, Назаркулова Айнура, Нарын мамлекеттик университетинин профессору Эрмек Байбагышев, И.Разаков атын. Кыргыз мамлекеттик техникалык университетинин профессору Акылбек Чымыров, ОшМПУнун ректору Бекмурза Зулуев, КӨЭАУнун ректору Абдилбает Мамасыдыков, ОшТУнун жетекчилиги жана окутуучулары катышты.
Иш-чаранын жүрүшүндө Зальцбург университетинин профессору, Евразия-Тынч океан университеттер аралык тармагынын (Eurasia-Pacific Uninet – EPU) президенти Жозеф Штробль аталган тармак тууралуу кеңири маалымат берип, анын мүмкүнчүлүктөрүн түшүндүрдү. Ошондой эле, ОшТУда ишке ашып жаткан “Тоолуу аймактардагы суу запасынын өзгөрүүлөрүн жергиликтүү деңгээлде талдоо – WaterFlow” долбоору тууралуу маалымат берилди.
Жолугушууда профессор Жозеф Штроблго Ош технологиялык университетинин ардактуу профессору наамы ыйгарылды.
Жолугушуу суроо-жооп форматында өтүп, катышуучуларды кызыктырган маселелер талкууланды.
ОшТУнун ректору Жанболот Турсунбаев:
“Зальцбург университети менен көп жылдан бери тыгыз кызматташып келебиз. Бул байланыш биздин студенттерге жана окутуучуларга эл аралык деңгээлде билим алып, тажрыйба топтоого чоң мүмкүнчүлүк түзөт. Бүгүнкү жолугушуу мындан аркы кызматташтыкты дагы да бекемдейт деп ишенем,” – деп белгиледи.
Жолугушуунун алкагында EPU тармагына Ош мамлекеттик педагогикалык университети жана Кыргыз-Өзбек Эл аралык университети өнөктөш болуп кабыл алынып, эки тараптуу кызматташуу келишимине кол коюшту.
Маалымат үчүн:
EPU тармагы 2000-жылы негизделген жана Австрия университеттери менен Борбордук, Чыгыш жана Түштүк Азия өлкөлөрүнүн, ошондой эле Тынч океан аймагындагы ЖОЖдор менен илимий кызматташтыкты өнүктүрүүгө багытталган. ОшТУ бул тармакка 2009-жылы кошулган.
ОшТУ менен Зальцбург университети 2009-жылдан бери Tempus, Erasmus, Erasmus+ программаларынын алкагында бир нече долбоорду ийгиликтүү ишке ашырып келет. Бул кызматташуу геоинформатика жана картография багытында магистрдик жана докторантура (PhD) программаларын өнүктүрүүгө, академиялык мобилдүүлүктү кеңейтүүгө чоң салым кошкон.
