Ош технологиялык университетинде 11–18-июль күндөрү Түштүк Кореянын Суңшил университетинен келген ыктыярчылар тобу үчүн жайкы мектеп ийгиликтүү өткөрүлдү.
Белгилүү жогорку окуу жайлардын бири болгон Суңшил университетинен келген 32 адамдан турган делегациянын курамына окутуучулар жана студенттер кирди. Алар ОшТУда ар түрдүү багыттагы иш-чараларды өткөрүп, студенттер менен биргеликте билим жана маданият алмашуу платформасын түзүштү.
Жайкы мектеп алкагында ыктыярчылар 12–13-июль күндөрү университеттин бир катар окуу кааналарын сырдап, иретке келтирүү жана тазалоо иштерин жүргүзүштү. Бул демилге университеттин инфраструктурасын жакшыртууга кошкон баалуу салымдардын бири болду.
14-июлдан 18-июлга чейин болсо Суңшил университетинин профессорлору жана студенттери тарабынан Сежон корей тили борборунун студенттери үчүн атайын тил жана маданият лагери уюштурулду. Сабактар интерактивдүү форматта өтүп, студенттер корей тили менен катар Корея элинин үрп-адаты, салттары жана маданияты менен терең таанышышты.
Жайкы мектеп алкагында өзгөчө көңүлдү бурган иш-чаралардын бири — экологиялык маселелер боюнча өткөрүлгөн талкуу болду. Суңшил университетинин профессорлору глобалдык экологиялык көйгөйлөр, жаратылышты коргоо, таштандыларды башкаруу жана жашыл жашоо образы тууралуу баяндамалар менен чыгып, студенттерге практикалык кеңештерди беришти.
Катышуучулар экологиялык маданиятты өнүктүрүү максатында төмөнкү сунуштарды билдиришти:
Пластикти азайтуу жана таштандыларды сорттоо;
Сууну жана электр энергиясын үнөмдөө;
Велосипед колдонуу жана коомдук транспортту тандап алуу;
Өсүмдүк өстүрүү, дарак отургузуу;
Экологиялык челлендждерди өткөрүү.
Жыйынтыктоо аземи 18-июль күнү өтүп, ага ОшТУнун ректору, профессор Жанболот Турсунбаев катышты. Ал Суңшил университетинин делегациясына ыраазычылык билдирип, бул кызматташтык билим берүү жаатындагы достуктун ачык мисалы экенин белгиледи.
— “Университетте Сежон корей тил борбору ачылганына быйыл 13 жыл болду. Бул аралыкта жүздөгөн студенттер корей тилин үйрөнүп, Кореяда билим алып жатышат. Суңшил университети менен болгон кызматташтыгыбыз мындан ары да жаңы деңгээлге көтөрүлөт деп ишенебиз”, — деди ректор.
Студенттер корей ырларын жана бийлерин аткарып, көрүүчүлөргө жагымдуу маанай тартуулашты. Бул кечеде ар улуттуу жаштардын достугу, тил жана маданият аркылуу жакындашуусу даана көрүндү.
Эки окуу жайдын ортосундагы кызматташтык 2018-жылдан бери үзгүлтүксүз уланууда. Жыл сайын уюштурулган жайкы мектеп жана ыктыярчылар лагери кыргыз жана корей студенттери үчүн уникалдуу мүмкүнчүлүк жаратып келет.
ОшТУ жетекчилиги Суңшил университетине терең ыраазычылыгын билдирип, мындан ары да кызматташтыкты кеңейтүүгө жана жогорку деңгээлде улантууга даяр экенин билдирди.
