Ош технологиялык университетинде бүтүрүүчүлөр жана студенттер үчүн Түштүк Кореяда болуу эрежелериндеги соңку өзгөрүүлөр, коопсуз миграция жана мыйзамдуу жумушка орношуу боюнча маалыматтык жыйын болуп өттү.
Иш-чара Кыргыз Республикасынын Эмгек, социалдык камсыздоо жана миграция министрлигине караштуу Жарандарды чет өлкөдө ишке орноштуруу борборунун Түштүк региону боюнча бөлүмү жана ОшТУнун эл аралык байланыштар бөлүмүнүн демилгеси менен уюштурулду.
Иш-чарага Жарандарды чет өлкөдө ишке орноштуруу борборунун Түштүк региону боюнча бөлүмүнүн башчысы С.А. Токтосунов жана Корея Республикасынан келген делегация – Адам ресурстарын өнүктүрүү кызматынын, ошондой эле Ишке орношууга уруксат системасынын (Employment Permit System – EPS) Кыргызстандагы борборунун директору Ким Ын Жи катышты.
Жыйындын жүрүшүндө студенттерге EPS системасынын алкагында Кореяда мыйзамдуу ишке орношуу жол-жоболору, миграциялык эрежелер жана коопсуз шарттар тууралуу кеңири маалымат берилди. Катышуучуларга маалымат баракчалары таркатылып, суроо-жооп түрүндөгү жигердүү талкуу болду.
EPS (Employment Permit System) – 2004-жылдан бери Корея Республикасында ишке ашып келе жаткан система болуп саналат. Анын алкагында орто жана чакан ишканалар чет өлкөлүк жумушчуларды мыйзамдуу түрдө жумушка ала алышат. Мурда бул мүмкүнчүлүк негизинен квалификациялуу адистер үчүн гана жеткиликтүү болсо, азыр EPS аркылуу орто даражадагы жумушчулар дагы мыйзамдуу түрдө ишке орношо алышат. Бул система аркылуу иштеген чет өлкөлүк жумушчулар Кореянын эмгек мыйзамдарына ылайык жергиликтүү жарандар менен тең укукка ээ болуп, минималдуу эмгек акысынан жогору маяна алышат.
Иш-чарага ОшТУнун студенттери активдүү катышып, алар үчүн пайдалуу маалыматтар менен коштолгон маанилүү платформа болду.
Белгилей кетсек, ОшТУда уюшулган Корея борбору ОшТУнун студенттерине акысыз корей тилин үйрөтүүнү колго алган. Ал жерде Түштүк Кореядан келген тажрыйбалуу илимпоз окутуучулар сабак өтүшөт.
