Кытай-Борбор Азия мамлекеттеринин кызматташтыгы боюнча конференциянын алкагында “Интеграция жана инновация” темасындагы тематикалык семинар болуп өттү. Иш-чарага Ош технологиялык университетинин (ОшТУ) делегациясы катышып, санариптик интеллектти колдонуу менен кесиптик билим берүүнү өнүктүрүү боюнча маселелер кеңири талкууланды.
Семинардын жүрүшүндө ОшТУнун окуу иштери боюнча проректору Улукбек Мамытов “Бир алкак – бир жол” долбоорунун алкагында билим берүү тармагындагы эл аралык интеграция” темасында доклад жасап, университеттин бул жаатта жүргүзүп жаткан иш-аракеттери тууралуу кеңири маалымат берди.
Иш-чаранын алкагында “Ясинь” өнөрканасынын (кытай тили + көндүмдөр) ачылыш аземи болуп өттү. Аземге Бинтуан Синсинь кесиптик-техникалык колледжинин директору жана ОшТУнун окуу иштери боюнча проректору Улукбек Мамытов катышышты.
Мындан сырткары, ОшТУнун жетекчилиги Бинтуан Синсинь кесиптик-техникалык колледжинин жана Yalong Group корпорациясынын башкы директору менен эки тараптуу жолугушууларды өткөрүп, мындан аркы кызматташуунун багыттары боюнча пикир алмашышты.
Белгилей кетүүчү жагдай, буга чейин Бинтуан Синсинь кесиптик-техникалык колледжинен ОшТУнун Энергетика жана транспорт институтуна 2 500 000 сомдук заманбап электр жабдуулары белек катары тапшырылган.
Бул иш-чара Кытай жана Борбор Азия өлкөлөрүнүн билим берүү мекемелеринин ортосундагы кызматташтыкты бекемдөөгө, санариптик жана кесиптик билим берүү тармагында биргелешкен долбоорлорду ишке ашырууга өбөлгө болору күтүлүүдө.
