2025-жылдын 29-апрелинде Ош шаарында бүтүрүүчү студенттер үчүн чоң мааниге ээ болгон кесипке багыт берүү жана жумуш мүмкүнчүлүктөрүн сунуштаган жарманке ийгиликтүү өткөрүлдү. Бул иш-чара “Миграциялык Ресурстук Борбор” жана Ош технологиялык университети тарабынан уюштурулуп, жогорку жана орто кесиптик окуу жайларынын бүтүрүүчү курс студенттерине арналды.
Иш-чарага Кыргыз Республикасынын Эмгек, социалдык камсыздоо жана миграция министри Сабиров Равшанбек Азатович, парламенттин мурдагы спикери Матубраимов Алманбет Матубраимович, Ош шаардык эмгек, социалдык камсыздоо жана миграция башкармалыгынын Калкты иш менен камсыз кылууга көмөктөшүү бөлүмү жана Ош шаарынын мэринин орун басары Аманова Салтанат Абдылдаевна катышты. Бул — бүтүрүүчүлөрдүн келечегине мамлекеттик деңгээлде кам көрүлүп жаткандыгынын далили.
Иш-чара Ош улуттук драма театрында өткөрүлүп, ага 40тан ашуун ишканалар, мекемелер жана эл аралык уюмдар катышты. Алар студенттерге реалдуу жумуш мүмкүнчүлүктөрүн сунуштап, ар түрдүү тармактардагы бош орундар боюнча кеңири маалымат беришти. Катышуучулардын арасында мамлекеттик органдар, жеке сектор өкүлдөрү жана эл аралык долбоорлор дагы болду.
Иш-чаранын ачылышында Ош технологиялык университетинин окуу иштери боюнча проректору Улукбек Жанышович Мамытов сөз сүйлөдү. Ал өз сөзүндө техникалык билимдин бүгүнкү күндөгү өзгөчө маанилүүлүгүн баса белгилеп, студенттерди кесиптик жактан үзгүлтүксүз өнүгүүгө жана заманбап талаптарга ылайык билимин тереңдетүүгө чакырды. Ошондой эле, мындай жарманкелер жаштар үчүн жаңы мүмкүнчүлүктөрдү ачууга жардам берерин баса белгиледи.
Жарманкенин негизги максаты — бүтүрүүчү студенттерди потенциалдуу жумуш берүүчүлөр менен бетме-бет жолуктуруу, аларга ишке орношуу шарттары тууралуу түз маалымат берүү жана келечек кесибин тандоого жардам берүү болду. Иш-чаранын жүрүшүндө студенттер резюмелерин тапшырып, компаниялардын өкүлдөрү менен маектешип, реалдуу жумуш сунуштары боюнча сүйлөшүүлөрдү жүргүзүштү.
Ош технологиялык университети бул иш-чаранын расмий өнөктөшү катары өзүнүн бүтүрүүчү студенттерин активдүү катышууга үндөдү. ОшТУнун окуу бөлүмүнүн практика жана карьера бөлүмүнүн башчысы Махабат Ибраева волонтёр студенттер менен биргеликте уюштуруу иштерине жигердүү катышты. Университет студенттердин практика жана жумушка орношуу мүмкүнчүлүктөрүн кеңейтүүгө багытталган мындай демилгелерди дайыма колдоп келет.
Бул жарманке бүтүрүүчүлөр үчүн өз келечегин туура пландоого, рыноктогу талаптар менен жакындан таанышууга жана биринчи жумуш ордун табууга чоң мүмкүнчүлүк берди.
