2025-жылдын 29-апрелинде Ош технологиялык университетинде жаштар үчүн маанилүү иш-чара — укук бузууларды жана терс көрүнүштөрдү алдын алуу максатында “Жаңы муун – жаркын келечек, таза муун – коопсуз келечек” аталышындагы жаштар форуму өткөрүлдү. Бул иш-чара Кыргыз Республикасынын Министрлер Кабинетинин 2023-жылдын 4-декабрындагы “2022–2028-жылдарга карата укук бузууларды алдын алуу” боюнча мамлекеттик саясаттын концепциясынын негизинде уюштурулду.
Форумду Ош шаардык ички иштер башкармалыгынын Ак-Буура бөлүмү Ош технологиялык университети менен биргеликте өткөрүп, жаштар арасында:
— Зордук-зомбулукту,
— Экстремизм жана радикал агымдарга аралашууну,
— Синтетикалык жана психотроптук заттарды колдонуу сыяктуу коркунучтарды алдын алуу максатын көздөдү.
Форумга Ош ШИИБнин башчысынын орун басары, милициянын полковниги Козубаев Кожобек Ганыевич, жана Ак-Буура МБнын башчысынын орун басары, милициянын капитаны Абдиев Шумкар Кутманович катышышып, жаштарга укуктук түшүндүрүү иштерин жүргүзүштү.
Иш-чарада студенттерге жарандык жоопкерчилик, мамлекеттүүлүккө болгон милдет жана коопсуз келечекти куруудагы жаштардын ролу тууралуу кеңири маалыматтар берилди.
Мындай форумдар — жаштардын аң-сезимин жогорулатууга жана терс көрүнүштөрдөн алыс болууга чоң түрткү берет.
