Жусуп Баласагын атындагы Кыргыз Улуттук университетинин ректору Догдурбек Чонтоев баштаган жамаат Ош технологиялык университетине иш сапар менен келишти.
Делегацияны Ош технологиялык университетинин ректору, профессор Жанболот Турсунбаев жана проректорлор, институт директорлору, бөлүм башчылардан турган топ тосуп алды.
Иш сапардын максаты тууралуу Д.Т.Чонтоев: «Биздин кыргыз автоном облусуна жашташ жана тарыхташ окуу жай адис даярдоо боюнча абдан жигердүү иштөөдө. Ош тараптагы ири окуу жайлардын иши кызыктуу, илимий коллабарация, академиялык мобилдүүлүк алакаларын жакшыртууну күчөтүү зарылдык!» -деп белгиледи. Биргелешкен иликтөөлөр, кыска мөөнөттүү окутуулар, конок лекцияларды жандандырып, Президенттин «Улут уңгусу» программасын жайылтуу, 12 жылдык билим берүүгө өтүүдө ЖОЖжордун ордун белгиледи .
ОшТУнун ректору Ж. Турсунбаев: «Биздин окуу жай технологиялык багытта. Бирок, КУУ менен 6 адистикте окшош адистиктерди даярдашат. Ошондуктан тажрыйба алмашуу жана илимий алакалар сонун натыйжа берет. Өлкөнүн келечеги өндүрүш менен! Биргелешип экономист, программист, химиялык технологдор, дизайнер жана бухгалтерлерди даярдоо мамлекетке кошкон салымыбыз болот»-, деп токтолду.
КУУнун журналистика жана коммуникация институтунун директору Ш.Костюк студенттерди Ош технологиялык университети тууралуу кыска ролик, репортаж жасатуу практикасын сунуштады. Өз кезегинде ректор Ж. Турсунбаев ОшТУ байланышчы, программист, техникалык тейлөөчүлөр менен журналистика институтунун биргелешкен аракети мамлекеттин маалымат жана байланыш саясатында мыкты тандем болорун белгиледи.
Жолугушуунун аягында кызматташуу боюнча меморандумга кол коюлду.
