М.М. Адышев атындагы Ош технологиялык университети жаш окумуштууларды жана студенттерди Бүткүл дүйнөлүк суу күнүнө жана мөңгүлөрдү сактоонун эл аралык жылына арналган “Илим. Технологиялар. Инновациялар” аттуу VIII илимий-практикалык конференциясына катышууга чакырат.
Конференциянын ачылуу аземи 2025-жылдын 25-апрель күнү М.М. Адышев атындагы Ош технологиялык университетинин чон актылар залында саат 10:00дө башталат.
Дареги: Ош шаары Н.Исанов көч./81, ОшТУ.
“Илим. Технологиялар. Инновациялар” аттуу VIII илимий-практикалык конференциянын алкагында төмөнкүлөр пландаштырылууда:
1. «Келечектин илими: билим горизонттору жана учурдун чакырыктары» деген темада ТАЛКУУЛОО ПАНЕЛИ.
ОшТУнун Жаш Окумуштуулар Кеңеши адистерди, өндүрүш кызматкерлерин, илимий кызматкерлерди жана студенттерди тартуу менен учурдун актуалдуу маселелерин талкуулайт.
2. Төмөнкү темалар боюнча МАСТЕР-КЛАССТАР:
– Суунун сапатын аныктоо – катышуучулар сууну анализдөөнүн заманбап ыкмаларын өздөштүрүп, анын ар кандай максаттарга ылайыктуулугун аныктоону үйрөнүшөт;
– Мөңгүлөрдүн моделдерин түзүү – мастер-класста мөңгүлөрдү моделдөө ыкмалары жана алардын динамикасы, ошондой эле муз катмарынын өзгөрүшүн болжолдоо жолдору талкууланат;
– Суу менен камсыздоо боюнча инновациялык чечимдерди иштеп чыгуу – катышуучулар суу менен камсыздоо тармагындагы акыркы технологиялар менен таанышып, өздөрүнүн инновациялык долбоорлорун иштеп чыгууну үйрөнүшөт;
– SenseBox менен аба-ырайы маалыматтарын чогултуу жана талдоо – катышуучуларды SenseBox метеорологиялык сенсорлорунун иштеши менен тааныштыруу, аба-ырайы жөнүндө маалыматтарды (температура, нымдуулук, басым ж.б.) чогултууну жана булут платформаларынын жардамы менен талдоону үйрөтүү.
3. ХАКАТОН ЖАНА КОНКУРС
Жаратылыш ресурстарын пайдалануу менен байланышкан көйгөйлөрдү чечүүгө багытталган долбоорлор сынагы.
4. Төмөнкү багыттар боюнча секциялык иштер:
1. Туруктуу өнүгүүнү камсыздоодо инновациялык санариптик технологиялар;
2. Суу ресурстарын жана мөңгүлөрдү сактоонун экономикалык жана башкаруу аспектилери;
3. Суу ресурстары жана мөңгүлөрдү сактоо жаатында билим берүү жана маалымдоо;
4. Тоолуу аймактарда сууну туруктуу пайдалануу үчүн архитектуралык-курулуш чечимдери;
5. Суу ресурстарын жана мөңгүлөрдү сактоо контекстинде энергетика жана транспорт;
6. Айлана-чөйрөнү башкаруунун технологиялары жана суу ресурстарынын экологиялык коопсуздугу;
7. Коомдун өнүгүүсүндөгү гуманитардык илимдердин ролу: тил, коммуникация, спорт жана туруктуулук;
8. Гуманитардык жана технологиялык билимдердин интеграциясы: билим берүү жана коом үчүн жаңы мүмкүнчүлүктөр.
Катышуу формасы: гибриддик (онлайн, оффлайн). Макалалар кыргыз, орус жана англис тилинде кабыл алынат.
Конференцияга катышууга студенттер, илимий кызматкерлер, аспиранттар, магистранттар жана жаш окумуштуулар чакырылат.
Конференцияга катышуунун шарттары:
Катышуу үчүн арыздар жана докладдардын тексттери уюштуруу комитети тарабынан 2025-жылдын 10-апрелине чейин кабыл алынат. Илимий-изилдөө иштеринин жыйынтыктарын камтыган эң кызыктуу баяндамалардын материалдары тандалып алынып, илимий-практикалык конференциянын жыйнагында жарыяланат. Магистранттардын жарык көргөн илимий эмгектери магистрдик коргоодо эсепке алынат. Эң мыкты докладдар дипломдор менен сыйланат.
Конференцияга катышуу жана докладдарды жарыялоо акысыз.
Макала төмөнкүдөй логикалык структурада камтылууга тийиш:
1. Киришүү;
2. Изилдөөнүн актуалдуулугу жана максаттары;
3. Изилдөөнүн материалдары жана ыкмалары;
4. Изилдөөнүн натыйжалары жана корутундулары.
Макаланын жалпы тексти Microsoft Word программасында, «Times New Roman» шрифтинде, эгерде текст кыргыз тилинде жазылган болсо «Tamga KIT (кириллица)» шрифти менен, 14 өлчөмүндө, бардык тилкелер – 2 см, интервал – 1, абзац чегинүүсү – 1 см, формат A 4 жана жалпы көлөмү 5-7 беттен кем эмес болушу керек. Макаланын жогорку сол бөлүгүндө УДК көрсөтүлүшү керек. Эгерде текст орус тилинде жазылган болсо, анда автордун аты-жөнү, макаланын аталышы, аннотация жана ачкыч сөздөр текст орус тилинде жазылгандан кийин гана орус жана англис тилдеринде ирети менен берилет. Автор жөнүндө маалымат – аты-жөнү, окуган жери (курс, тайпа, факультет, университет, шаар, өлкө), байланыш номери, электрондук дареги жана илимий жетекчинин аты-жөнү сол тарапта толук түрдө кыргыз, орус жана англис тилдеринде берилиши керек. Макаланын аталышы ортого жайгаштырылып, баш тамгалар менен кыргыз, орус жана англис тилдеринде көрсөтүлөт. 50-100 сөздөн турган аннотация жана ачкыч сөздөр кыргыз, орус жана англис тилдеринде курсив менен жазылат. Тексттеги таблицалар, диаграммалар, графиктер, сүрөттөр номерлери менен jpg форматында берилет.
Шилтемелер чарчы кашаанын ичинде көрсөтүлүп [ ], шилтемелердин тизмесине дал келиши керек. Колдонулган адабияттар ГОСТ 7.1-2003 талаптарына ылайык алфавиттик тартипте жайгаштырылып, ирети менен 5-10 адабияттын тизмеси берилет. Макалалар антиплагиат программасынан ийгиликтүү өткөн 70% оригиналдуу материалды камтууга тийиш.
Пленардык отурум 2025-жылдын 25-апрелинде саат 10:00дө, секциялык отурумдар 13:00-17:00гө чейин болот. Авторлор баяндаманын мазмуну, стили жана сапаты үчүн толук жоопкерчилик алат.
Конференцияга катышуу үчүн материалдар электрондук жана кагаз түрүндө 2025-жылдын 10-апрелине чейин И.Т.И. белгиси менен төмөнкү дарек боюнча жөнөтүлөт: Кыргыз Республикасы, 723503, Ош ш., Н.Исанов көчөсү, 81. ОшТУ, Илим, инновация жана кошумча билим берүү бөлүмү, ilim-science@oshtu.kg , байланыш телефондору: 0777857444, 0990577200.
Уюштуруу комитети
