Өзбекстан мамлекетинин борбору Ташкент шаарында “Кесиптик билим берүүнү туруктуу өнүктүрүүнүн регионалдык аспекттери: көйгөйлөр жана келечек” деп аталган биринчи аймактык илимий-практикалык конференция өткөрүлдү. Аталган иш чаранын негизги максаты кесиптик билим берүүнү эл аралык деңгээлде өнүктүрүү жана кызматташуу болуп саналат.
Конференцияга Германия, Австрия, Казакстан, Таджикстан, Өзбекстан жана Кыргызстандын окумуштуулары, өндүрүш кызматкерлери, эксперттер жана иш берүүчүлөр катышып, Ош технологиялык университетинин Колдонмо илимдер институтунун директору, ОшТУнун профессору Аттокуров Урмат Төлөгөнович катышып келди. Мында жогорку жана орто кесиптик окуу жайларындагы кесиптик билим берүүнүн туруктуу өнүгүүсүнүн көйгөйлөрү, келечеги жана колдонмо илимдер боюнча ар кандай маселелер козголуп, келечекте колдоого алына турган сунуш-пикирлер айтылды. Эки күнгө созулган иш чаранын жыйынтыгында конференциянын катышуучуларына сертификаттар тапшырылды. Илимий конференциянын алкагында Ош технологиялык университети менен Ташкент химия-технологиялык институтунун ортосунда эки тараптуу кызматташуу тууралуу келишим түзүлдү.
