Фергана политехникалык институтунун экономика, менеджмент, бухгалтердик эсеп жана аудит, жеңил өнөр жайы технологиясы, азык-заттардын жана айыл чарба азыктарынын технологиясы багытынын студенттери окуу жайлар аралык түзүлгөн келишимдин негизинде Ош технологиялык университетине келип окуп жатышат. Бул иш чара эки тараптуу тажрыйба алмашуу, багыты туура келген студенттерге биздин жерибизде билимин улантууга мүмкүнчүлүк берүү менен, эки элдин достугун бекемдөө, улуттар аралык ынтымакты чыңдоо жана эл аралык билим берүү мейкиндигинде биргелешип аракет кылуу максатында уюштурулуп жатат.
Мындан ары окутуу менен катар окуу жайлар аралык студент-илимпоздор менен биргелешкен илимий-изилдөөлөрдү жүргүзүү, достук фестивалын, спорттук жана маданий иш чараларды биргелешип өткөрүү боюнча дагы иштер уланат. Ферганадан келген студент-коноктор алгач университеттин материалдык-техникалык базасы жана бүгүнкү күндөгү ишмердүүлүгү менен таанышып чыгышты. Ош технологиялык университети менен Фергана политехникалык институту буга чейин дагы тыгыз байланышта иш алып барып келген.
